السلام عليكم و رحمة الله و بركاته
ازيكم يا بنات
بصوا بقي انا لقيت ان فيه بنوتات كتير بتكون كسلانة الصبح من تنضيف البيت و مش عارفة تبدأ منين
و تفضل تدور و تلف حوالين نفسها
قلت اقولكم طريقتي يمكن تنفع حد فيكم
بصي بقي يا فتوكة منك ليها
انتي اول ما تفتحي عينيكي و تقولي دعاء الاستيقاظ ( الحمد لله الذي احيانا بعد ما اماتنا و اليه النشور )
طبعا بتروحي جرررررررررررررري علي التواليت
تقومي تعملي ايه بقي؟؟
ترشي قاعدة التواليت بهاربيك او المنظف اللي بتستعمليه و شوية علي الارضية ( انا باستعمل جينرال ) و شوية علي لوفة و تدعكي الحوض و بمقشة خشنة تدعكي الارض و بفرشاة التواليت تلمعي التواليت و تشدي السيفون و بالدش شطفي كل الحمام ولو عندك ديتول حطي غطا علي الارضية و بالمساحة شدي المية و هتلاقي الحمام بقي فلة في 10 دقايق و ريحته تهبل
خلاص اتوضيتي بقي و صليتي الضحي
فطرتي و نزلتي ابو العيال و شربتي مج النسكافيه المتين؟
ياللا بقي قومي هاتي شنطتين بلاستيك
ايوة ما تبصليليش كده هههههههههههههههههههههههههههههه هه
امسكيهم في ايدك يا قمر و دلوقتي دور اول لفة في البيت
هتعملي ايه بقي؟؟
هتبتدي من الاوض
تمشي تلمي يا قمر اي حاجة محتاجة تترمي في شنطة من اللي معاكي
و ماتنسيش لو فيه باسكت في الاوضة تفضيه
و اي حاجة مش في مكانها تحطيها في الكيس التاني
و تمشي كده علي كل الاوض
اللفة دي مش هتاخد غير ربع ساعة بالكتير اوي
لما توصلي المطبخ ارمي الكيس بتاع الحاجات اللي عايزة تترمي في الباسكت
و باقي معاكي كيس
ياللا بقي اللفة التانية
و انتي راجعة و الشنطة معاكي رجعي كل حاجة فيها مكانها
و بس كده يا مزة
البيت بقي رايق مش فاضل غير انك تكنسي و تمسحي و تشوفي هتعملي ايه من غير لف و لا دوران و دوخة
انا كمان باكون حاطة الغسيل في الغسالة قبل ما انام و لما اصحي قبل الفطار بأنشره
يا رب موضوعي يكون عجبكم
اللهم بلغنا رمضااااااااان
موضوع: كيسين و لفتين و بيتك هيبقي فلة 
الأحد أكتوبر 14, 2012 11:19 am