السلام عليكم ورحمة الله وبركاتة
كل سنة وانتو طيبين يا احلى منتدى
الحمد لله رب العالمين دخلت علينا اروع الشهور وباقى اقل من شهرين لاحب الشهور على قلوبنا جميعا
شهر رمضان المبارك
اعادة الله على الامة الاسلامية جميعها باليمن والخير والبركات والسلام
حبيباتى كم منا بينشغل قبل بداية الشهر الكريم بالتسوق للشهر
كم واحدة فينا بتصرف اد كل شهر اضعاف الاضعاف على الاكل فى رمضان
ملايين منا بينشغلو بالعزايم ويتركو العبادات
طبعا الموضوع مش فى ركن اسلامى لكن باختصار كلنا عارفين ان رمضان شهر عبادة
علشان كدة حبيت اتكلم معاكو فى اكتر من نقطة
اولا :اسمحولى اسالكم سؤال
هو رمضان مش زى باقى شهور السنة ؟؟
بمعنى اية فرق رمضان عن باقى الشهور من الناحية المادية وتجهيزات الشهر
لية الاصراف يا بنات
تعالو يا بنات نكون اقتصاديين وطبعا مش هنحرم نفسنا بس بلاش تبزير واصراف
تعالو نخلى رمضان السنة دى زى باقى الشهور هنعمل اكل اة وهنعزم قرايبنا اة لكن بدون اسراف
ثانيا بقى : لية تمنعى نفسك عن العبادات علشان تطبخى وتنزلى تشترى وبتنضفى
تعالى هقولك على شوية حاجات نعملها سوى
اية رايكم يا بنات نجهز لرمضان قبلها
وبعدين بقى فيكى يا كنزى انتى هتلخبطينا ماانتى قلتى بلاش اسراف
اة يا بنات انا قلت كدة بس قلت برضو بلاش نحرم نفسينا
تعالو نفهم بطريقة عملية
بصى يا قمر
احنا هنجيب حاجات تكفينا الشهر وزى مااتفقنا باقتصادية لكن قبل الشهر علشان منتعطلش عن العبادات
طيب هنجيب اية ؟؟
تعالو هقولكم
طبعا فى حاجات هنجيبها تكفى الشهر وهى :
ارز
مكرونة
ممكن بعض الخضار ونجهزو ونجمدة فى الفريزر
سمك
فراخ
لحمة
طيور
كفتة وبرجر وبانية
وممكن نجيب طماطم ونعملها صلصة ونشيلها فى الفريزر علشان نوفر وقت
وممكن نجيب المشمش ونجهزة فى اكياس لمهلبية قمر الدين
وفى مكسرات للحلويات الرمضانية
فول سودانى
ذبيب
جوز هند
بلح
وفى انواع كتير حسب الرغبة والميزانية بس دول الاساس
وتعالو نجهز ونجيب العصاير
نجيب عصاير بودرة
وازايز عصاير جاهزة
وكركدية
وتمر هندى
سوبيا
وفى انواع كتير حسب الرغبة والميزانية بس دول الاساس
وطبعا يا قمرات الحاجات مش هنشتريها ونركنها لا المفروض نرصها فى اماكنها
ودة هيدخلنا على النقطة التانى
النضافة فى رمضان
اكيد نظافة بيوتنا فرض على الكل سواء فى رمضان او غيرة
وبرضو هقولك جدول للنضافة فى رمضان
بصى يا قمر قبل رمضان باسبوع وضبى بيتك
بمعنى انك تجهيزة للعيد
هتقولولى ازاى ورمضان لسة مبداش؟
هقولك علشان متضيعيش فضل العشر الاواخر فى التنضيف
طبعا احنا فى الصيف
بصو بقى هنشيل السجاد والموكيت والستاير ونودية يتنضف او نغسلة فى البيت
وهنلفو كويس بورق جرايد او مشع كبير ونركنة فى صحارة السرير او مكان كويس
وهنبدا نزعف الشقة كلها ونغسل الحيطان والسيراميك او البلاط
وكدة هتكونى انجزتى 75 فى المية من تنضيف العيد
يعنى اللى هتعملية بقى خلال الشهر كل اسبوع مرة او مرتين هتنضفى الموبيليا والازاز وتمسحى الارض فى السريع
وهتلاقى نفسك قبل العيد بيومين تلاتة هتعملى تنضيفة حلوة وتفرشى السجاد وهتعلقى الستاير وبكدة مش هتكونى عطلتى نفسك ولا قصرتى فى حق ربنا وعباداتك ولا فى حق بيتك وزوجك
ونسيت اقولكم ممكن قبل رمضان بكام يوم برضو نشغل الهمة شوية ولو عندك غسيل خلصية كلة وحاولى تكوى كل هدوم جوزك علشان مش كل يوم مكوى فى رمضان وتتعطلى
وصدقونى لو عملنا كدة هيكون اللى ورانا بس كل يوم الاكل هنعملو قبل المغرب بساعة ولا اتنين
والغسيل مرة فى الاسبوع
وبكدة اكون خلصت اساس الموضوع
وطبعا اللى عندها اى اقرات تتفضل وهناقش الموضوع سوى
وكل سنة وانتو بالف خييييييييييير
موضوع: بيوتنا وعبادتنا احلى فى رمضان 
الأحد أكتوبر 14, 2012 11:28 am